虽然香港联赛并唔系亚洲一线联赛，但过往都有唔少外援球员以香港作为跳板，凭住自身的好表现转战其他更高水平的联赛。讲到由香港转战日本的外援，远的有「筋斗王」李安度由港甲转战日本加盟横滨水手，近的亦有曾效力富力R＆F的利安高加盟千叶市原。而讲到最新鲜滚热辣的，当然系今个夏天由梅州客家转投日乙甲府风林、2018至19年效力和富大埔期间赢得香港足球先生殊荣的伊高沙托尼。今次本栏就搵到呢位巴西前锋进行访问，分享下佢的近况。

甲府风林圆满收冠 阵内气氛高涨

有留意日本足球的球迷都知道，甲府风林最近就喺天皇盃决赛以日乙球队身份，爆冷击败广岛三箭勇夺冠军，兼且夺得来届亚冠盃分组赛资格。伊高沙托尼表示球队上下依然沉醉喺胜利的喜悦之中，事关球队晌进级路途上面接连淘汰几支日职联球队，去到决赛击败今季战绩不俗的广岛三箭夺冠更加系远超球员的想像，如此梦幻的旅程就令佢自己及全队上下都相当高兴。

取得首个入球增强自信心

喺击败广岛三箭夺标後，甲府风林返到日乙联赛就乘胜追击，作客对住町田泽维亚以2比1取胜之余，伊高沙托尼自己更取得首个日乙入波。伊高沙托尼表示队内竞争激烈，要争取上阵机会并唔容易，今次难得有正选机会而且取得入波协助球队全取3分，佢自己当然相当高兴；伊高沙托尼仲话自己以外援身份为球队效力，监督吉田达磨对佢的要求就更加高，而自己今季的状态暂时都未到顶峰，呢个开斋波就令佢的自信心增强不少。

加盟新球会 最紧要搏尽无悔

被问到对甲府风林呢间球会的观感，已经唔系第一次晌日本联赛效力的伊高沙托尼表示球队今季联赛战绩虽然平平，但其实阵中球员普遍质素唔错，竞争亦相当大，幸好一众球员之间都能够做到互相尊重，令佢好容易去适应。伊高沙托尼话自己虽然加盟争唔到正选席位，但佢一直都晌操练里面搏到尽，最终喺尾二一场联赛打正选之余更取得入波，足证自己的努力并无白费，而佢亦好多谢甲府风林晌呢半季畀佢效力的机会。

相隔10年再次效力日本球会 感觉大不同

对上一次晌日本球会效力，已经系10年前效力鹿岛鹿角，10年过後重游旧地，伊高沙托尼的感觉有乜唔同？伊高沙托尼就话10年前效力鹿岛鹿角嗰阵，自己仲系年青球员，亦只系上阵过2至3场比赛，晌当时只系抱住学习心态去效力；如今再次返到日本效力甲府风林，自己的比赛经验比以往丰富得多，再唔可以抱住学习心态效力，反而更加需要同队友分享自己的比赛经验去带动球队。伊高沙托尼补充话鹿岛鹿角始终系日本数一数二的大球会，球员当然比甲府风林高，虽然自己暂时唔算有好多上阵机会，但喺阵中的角色始终比以往效力鹿岛鹿角时更为重要。

新冠肺炎疫情 造就加盟甲府风林

当年效力和富大埔取得成功後，先转投富力R＆F然後再转战中甲加盟梅州客家，喺中国的事业似乎颇吃得开，伊高沙托尼点解会突然经过半季时间无班落再转战日乙？伊高沙托尼话去年受到疫情影响，中甲赛事采取赛会制之余，更对所有参赛球队实施闭环管理，佢因此要同当时怀孕的妻子分隔两地，更要喺妻子分娩後8个月先第一次见小朋友，令佢感到相当後悔，而为了可以陪伴屋企人同埋重拾球员应有的自由，佢决定离开中国返回巴西等待新合约来临。最终佢晌今个夏天得到甲府风林的斟介，加上日本联赛亦无任何针对球员的隔离措施，佢可以带埋屋企人一齐转战日本，因而造就佢第二度返到日本联赛效力。

怀念效力大埔时光 与旧队友仍有交流

伊高沙托尼喺2017至2018球季首度来港效力和富大埔，更喺翌季协助球队首夺港超联冠军，自己亦获选为当季香港足球先生。伊高沙托尼话当年有份协助和富大埔取得好成绩，自己亦赢得个人荣誉，所以到今时今日佢都好怀念晌大埔的日子；佢知道和富大埔今季重返港超联，仲一路有留意球队的消息。

伊高沙托尼虽然身在日本，不过就仲有同部份旧队友联络，佢话最近就经常同今季重返和富大埔效力的巴西同乡利马联络；另外，伊高沙托尼亦有同当年身为助教、今季升任主教练的李恒汇联系，似乎伊高沙托尼同和富大埔依然保持住良好关系。

名将之後 分享父亲近况

相信有唔少球迷都知道，伊高沙托尼的爸爸艾仙度亦系日职联名将，当年效力过鹿岛鹿角、川崎读卖及北海道札幌冈萨多，亦试过随川崎读卖来港喺亚冠盃出战东方，更使出百步穿杨绝技。伊高沙托尼表示父亲喺巴西的近况唔错，仲成日问候佢喺日本场内场外的情况，而佢自己亦好享受同父亲保持联络，因为咁样佢先得到推动力去鞭策自己进步。伊高沙托尼补充话父亲喺日本球坛有一定的地位，难免会有球迷拎佢哋进行比较，但佢强调自己的比赛风格同爸爸完全唔同，自己喺足球事业上亦有唔同的发展道路，佢唯一可以做的就系继续努力推动自己，证明自己亦可以独当一面。

将到而立之年 新球季有乜目标？

伊高沙托尼喺来年一月就会踏入30岁，来到而立之年佢对自己的事业又有乜展望？伊高沙托尼话相信自己仲可以踢多几年职业足球，短期目标当然系尽力表现自己，争取尽快落实下季喺边度落班，事关佢本身同甲府风林只系签了半季的合约，来季去向如何依然系未知之数。

给香港球迷的话

去到访问尾声，伊高沙托尼话喺自己的职业生涯里面，效力港超球会期间就为佢赢得唔少荣誉同掌声，绝对系佢足球生涯里面的巅峰时光，为此佢好多谢香港球迷过往对佢的支持；佢表示而家虽然身在日本效力，但都希望香港球迷可以继续支持佢，仲话第时如果有机会重返港超踢波，佢希望可以好似以往一样，继续得到香港球迷热情的拥护。

本周日职联直播时间：

10月29日下午2：00 横滨水手 对 浦和红钻 有线电视601／661

10月29日下午2：00 川崎前锋 对 神户胜利船 有线电视602／662

10月29日下午2：00 广岛三箭 对 北海道札幌冈萨多 有线电视604／664

10月29日下午2：00 京都不死鸟 对 大阪樱花 有线电视605／665