利物浦喺英超继续沉沦！周日(30日)凌晨英超大战，「红军」主场1比2输畀列斯联，连续第2场联赛输波之外，喺晏菲路球场19个月英超不败走势亦告结束。输波後利物浦喺联赛跌落第9位，同曼城相差13分，同第4嘅纽卡素亦有8分差距，今季前景危危乎。

利物浦上场联赛输畀包尾嘅诺定咸森林，今仗迎战赛前排19嘅列斯联，开波4分钟就送出大礼，祖高美斯喺右边自杀式回传，洛迪高龙门口轻松射成1比0。利物浦14分钟由穆罕默德沙拿闪电追平，之後亦一直控制战局，但列斯联门将梅斯利亚「上身」作出9次扑救，更喺完场前1分钟由森马维禁区内妙射破网，助列斯联爆冷赢2比1。

自2021年3月主场输畀富咸後，利物浦19个月、29场联赛主场不败走势惨被终结，亦系自2012年3月以来，首次连续2场输畀位处降班区域嘅球队。仲有一项数据证明利物浦今季大跌watt，佢哋上季各项赛事踢63场先输4场，今季只系踢咗18场就5次输波。

高普赛後失望表示：「今次系一大打击，一开波就失咗个超奇怪嘅波，球员好疲倦，完全控制唔到比赛，或者有部份球员上阵过多，好似锋线就场场都一样，因为球队只系得番3个前锋。」高普更表示担心会失去下季欧联参赛资格：「我唔系蠢材，我知道依家个距离同埋前面球队嘅实力，但以利物浦咁唔稳定嘅表现，系唔会拎到欧联资格，我哋要搵方法自救。」