巴西球星尼马2013年由山度士转投巴塞隆拿过程中，被指同父母及前巴塞隆拿会长罗素尔隐瞒部份转会费一案，终於有结果，西班牙检察官决定撤销对各人嘅控罪，尼马避过2年牢狱之灾。

今次案件由巴西公司DIS提出诉讼，该基金当年持有尼马40%拥有权，指控巴塞及尼马等有关方面隐瞒「枱底转会费」，令基金获得得转会费大大减少，要求尼马赔偿1.5亿欧元，一旦罪成，呢位30岁前锋可能会被判入狱2年。

不过，经过审查之後，西班牙检察官认为尼马等人并冇犯罪，案件未达到刑事诉讼标准，所以撤销对各人嘅控罪，认为DIS可以透过民事诉讼，追讨有关转会费损失。

虽然尼马成功甩身，但又转卷入另一个风波，佢喺近期巴西总统选举，公开支持现任总统博尔索纳罗，引起巴西足总不满，担心佢「选边站」，可能会得罪另一政治阵营嘅巴西球迷，影响球队争夺今届世界盃。