英格兰即将公布世界盃名单，史达宁入选应该冇乜问题，不过呢位前锋今夏由曼城转投车路士，进攻数据全面跌Watt，而且今季短时间内被安排出任6个唔同位置，搞到史达宁无所适从，有传佢嘅英格兰正帅位置都出现危机！

史达宁同哈利卡尼近年系英格兰入球泉源，但史达宁今季状态麻麻，18场比赛只有5入球，平均318.7分钟先入1球，比上季163.6分钟入球大幅下跌；另外，史达宁今季场均1.7次射门，亦系佢自2015年离开利物浦後最低纪录。

史达宁嘅下滑有迹可寻，佢喺车路士短短3个月时间就跟杜曹、朴达2个领队效力，期间踢过左翼衞、右翼衞、左翼、右翼、攻击中场同前锋6个位置，连领队都搵唔到最适合史达宁踢嘅位置，呢位27岁球星又点会交到好表现？英国《每日邮报》报道，英格兰领队修夫基有布卡约沙卡、拉舒福特、菲尔科顿同基亚利殊等状态大勇球星选择，史达宁正选岌岌可危。