养伤多时嘅曼城中场加云菲腊斯正式宣布伤愈，佢仲话已经同英格兰主帅修夫基通过电话，获得对方保证，只要证明身体冇问题，就会选佢入国家队踢今届世界盃。

26岁嘅加云菲腊斯今夏由列斯联转投曼城之後，一直饱受肩伤困扰，并於9月做手术，目前仅为曼城喺英超踢14分钟。

加云菲腊斯声称现时已经伤愈：「我经过7星期康复疗程，肩膀已完全痊愈，我同修夫基倾过，佢话只要我身体健康，就有机会入选大军名单踢世界盃，我依家状况良好，应该可以入选。」

加云菲腊斯亦话好多谢曼城领队哥迪奥拿支持，帮助佢尽快康复，并会安排佢踢周四(10日)凌晨英联盃对车路士，希望有助佢提升状态。