阿根廷国家队主帅史卡朗尼公布出战今届世界盃决赛周嘅26人大军名赛，锋线最受关注，球王美斯将第5次出战呢项大赛，同宿敌C朗睇齐，罗马前锋保罗戴巴拿有伤在身，仍然入选，但近期演出抢镜嘅曼联新星加拿祖榜上无名。

阿根廷锋线非常豪华，有美斯、曼城新星祖利安艾华利斯、两位国际米兰射手拿达路马天尼斯、祖亚昆哥利亚，早前伤愈嘅老将迪马利亚都有入选，养伤已经1个月嘅保罗戴巴拿亦有份，睇来史卡朗尼非常器重呢位28岁罗马前锋。

阿根廷呢份名单有9人来自西甲，6人来自意甲，只有1人效力阿根廷联赛，就系36岁河床门将法兰高艾马尼，属於全队最大年纪球员，但预料佢只会担任後备，正选门将应该系效力阿士东维拉嘅达米安马天尼斯。

美斯将第5次出战世界盃，佢累积上阵19场，射入6球及5次助攻，最威水系打入2014年决赛，但不敌德国。值得一提，美斯之前4次为阿根廷踢世界盃，有3次输畀德国，如果佢想一圆冠军梦，最好避开呢支「天敌」。

阿根廷今届世界盃抽入C组，同组对手有沙特阿拉伯、墨西哥、波兰。