周一(14日)凌晨英超休战前最後一仗，曼联凭18岁新星加拿祖喺93分钟绝杀，作客以2比1力克富咸，14战得26分升上联赛榜第5位。加拿祖今季喺曼联上阵机会增加，而且仲有出色表现，今年3月曾获阿根廷国家队徵召，可惜今届世盃名单落选，随时系阿根廷一大损失！

C朗因病缺阵，曼联今次续用安东尼马迪尔挂帅，14分钟基斯甸艾历臣近门射入，下半场富咸攻势旺盛，迪基亚要作出连番扑救，但61分钟终於顶唔住，走甩倒戈嘅丹尼尔占士被对方轻松射入。曼联72分钟同加拿祖入替冇乜表现嘅安东尼马迪尔，去到补时3分钟，呢位18岁小将接应基斯甸艾历臣直线，高速入楔快脚射入，助曼联赢2比1。

加拿祖入波後效法美斯嘅经典庆祝动作，除波衫向球迷展示自己嘅名字，呢位前锋月初欧霸盃作客皇家苏斯达一箭定江山，3日前英联盃对维拉又交出2次助攻，今仗更加拎到首个英超入球，令球迷觉得阿根廷唔拣佢入世盃大军系「走宝」。

曼联领队坦哈格赛後表示，世盃休战期对加拿祖系一大考验：「加拿祖要脚踏实地，依家有4个星期休战，对佢嚟讲系好危险，因为佢依家良好嘅节奏会被打断，冇比赛可能会失去专注同投入，加拿祖要做嘅系保持近期嘅态度。」