被视为今届世盃热门之一嘅英格兰，周一(14日)正式集结准备出征卡塔尔，英格兰足总亦公布各战将球衣号码，其中1至12号嘅主人同去年欧国盃拎亚军完全相同，意味着3号嘅劳基梳尔、6号嘅哈利马古尼同11号嘅拉舒福特，有望齐齐成为英格兰主力。

英格兰国脚周一集合後，齐齐出席一个赞助商活动，个个都笑得好开心咁揽头揽颈，将之前喺英超嘅斗争暂时抛开，其中上轮联赛受伤嘅李斯特城中场占士麦迪臣，亦有出席兼获分发25号波衫，证明佢伤患无碍可以继续卡塔尔之旅。

英格兰足总公布嘅球衣号码，1至12号都同欧国盃一样，史达宁继续着10号、哈利卡尼就着9号，正选位置受到质疑嘅哈利马古尼亦Keep住件6号波衫，至呢1至12号球员绝大部份都系欧国盃期间主力，似乎会继续获领队修夫基嘅信任。