阿仙奴翼锋加比尔马天尼利今季表现神勇，呢位21岁新星3年前由巴西第4级别球会加盟，依家就声价百倍，「兵工厂」亦食过番寻味，继今夏签入圣保罗翼锋马昆奴斯，据报佢哋又睇中哥连泰斯中坚罗拔雷兰，有机会1月出手抢人。

几日前啱啱19岁嘅罗拔雷兰系巴西U20国脚，今季已经喺巴甲为哥连泰斯一队上阵，擅长左脚嘅中坚一直系阿仙奴目标，据报阿仙奴嘅巴西总监伊度，已经运用佢嘅网络同哥连泰斯接触，最快冬季转会窗就会出手斟介。

除阿仙奴之外，消息指车路士同乌克兰劲旅辛尼特都有意将佢收归旗下，不过伊度作为前哥连泰斯总监，有望用「友情牌」令阿仙奴占先机。罗拔雷兰合约有5,000万欧元买断条款，不过阿仙奴有信心可以用较低价钱将佢收购。