C朗拿度接受老友皮尔斯摩根专访，未出街嘅节目预计仲有好多震撼内容，呢位英国名嘴周一(14日)再爆料，话C朗喺回答下一间球会系边间嗰阵，畀出一个「好吸引」嘅答案。身为阿仙奴球迷嘅皮尔斯摩根，更公开呼吁阿仙奴尽快签佢！

皮尔斯摩根喺个人twitter陆续「预告」专访中嘅内容，有爱尔兰主播Colgan留言话：「明显皮尔斯摩根想阿仙奴签C朗，场场畀佢踢前锋。」皮尔斯摩根就大方回应：「冇错！事实上C朗就系阿仙奴需要嘅球员，C朗同加比尔捷西斯可以带领阿仙奴捧盃。」皮尔斯摩根喺2019年首次同C朗做专访，就曾经送咗件印上C朗名字嘅阿仙奴7号波衫畀佢。

皮尔斯摩根同时透露佢同C朗系老友：「3年前我喺都灵首次同C朗做访问，访问後我哋食咗4个钟头晚餐，自从嗰次之後，我哋就成为最难以想像嘅好朋友，我哋经常交换讯息，佢总系好坦白咁同我讲佢嘅心底话。」