曼联球星C朗早前接受英国名嘴皮尔斯摩根专访，破天荒公开狂数曼联，当时节目精华片段出街之後，令人哗然。专访完整版分开两部份，喺英国时间周三(16日)及周四(17日)晚播出，其中C朗喺「上集」主力批评红魔鬼年轻球员唔听教。

C朗喺访问中表示对於曼联新一代球员好失望：「年轻球员对球队唔在乎，佢哋冇争胜饿渴感，总系唔听人意见，虽然有啲人会听，但大部份都唔听，令我觉得好惊讶，我认为佢哋大部份人嘅职业生涯唔会长。」

C朗认为各大联赛嘅年轻球员都有相同情况，好大程度上因为年代已经唔同，依家环境条件好，一切来得太容易，唔识珍惜，对於身体质素及精神力量嘅要求，唔可以同自己当年相提并论。

不过，C朗亦对其中3位曼联队友赞不绝口，包括葡萄牙同胞达洛治：「达洛治非常年轻，而且好有专业精神，相信佢会拥有好长球员生涯，利辛度马天尼斯都系，卡斯米路亦系，虽然佢已经30岁。」

另外，C朗表示原本以为曼联签入查顿辛祖、华拉尼加上佢，球队可以重上正轨，但却事与愿违，令佢感到震惊。