世界盃冇酒饮？虽然卡塔尔世盃决赛周即将展开，球迷却唔准饮酒！据英国传媒报道，卡塔尔王室向国际足协(FIFA)施压，要求喺8个世盃场馆内全面禁止卖酒，FIFA周五(18日)正式宣布，全部世盃球场不准卖酒，但後果是面临数百万镑嘅赞助赔偿。

世盃首次喺穆斯林国家举行，喺卡塔尔公众场合饮酒属於违法行为，而饮酒向来系球迷睇波嘅一大习惯。卡塔尔同FIFA就禁酒安排一直僵持，FIFA上星期答应将球场内啤酒赞助商广告，移去冇咁显眼嘅位置。

直至周五，国际足协发出最新禁酒令，宣布卡塔尔世界盃期间，全部8个球场禁止售卖啤酒。就连世界盃官方赞助商提供嘅「百威啤酒」都唔准卖，只能饮用非酒精饮品Budweiser Zero，球迷将度过一个无酒精嘅世界盃。

在此之前，世界盃官方球迷指南中写明，比赛开始前3小时，以及比赛後1小时，所有持票球迷可以在球场周边享用百威啤酒，球场周边更设立几十个「啤酒帐篷」。

随住卡塔尔王室嘅施压，FIFA宣布实施禁酒令。禁酒实施期间，球场内唯一可以饮酒嘅地方只有价值22,450美元嘅贵宾厢，或者去当豪华酒店享用，但价格非常昂贵，330毫升啤酒索价11.26美元。

不过，FIFA同百威啤酒早已为世界盃签署巨额赞助合约，如今临时实施禁酒令，FIFA将面临数百万镑计嘅违约索偿。