世盃B组重头戏，英格兰首仗大炒伊朗6比2，旗开得胜。「三狮兵团」今仗优势明显，两位小将祖迪比宁咸及布卡约沙卡齐齐有「士哥」，前景光明。

修夫斯继续倚重在曼联沦为後备嘅哈利马古尼踢正选，两闸用劳基梳尔同捷比亚，中前场起用布卡约沙卡、美臣蒙特同祖迪比宁咸等小将，配合队长哈利卡尼争取入球。伊朗方面场内场外都有抗争行动，有球迷喺观众席举牌抗议，部份伊朗球员在播国歌环节亦冇跟住唱。

甫接战伊朗就有门将比兰云特同队友相撞「爆缸」面部见血，治理近5分钟，坚持一段时间後退下火线，改由侯斯恩尼把关，顺带一提，奎罗斯徵召4位门将入队，世盃首仗即派上用场。马古尼今仗多次助攻，32分钟一次头槌最近磅，可惜中楣唔入。

不过英格兰好快搵到破敌策略，祖迪比宁咸接应劳基梳尔传送头槌破网，其後布卡约沙卡射入「世界波」，紧接住史达宁整多粒，仅花10分钟狂风扫落叶领先3比0完半场。

英格兰其後放慢节奏，但都畀布卡约沙卡射成4比0，伊朗泰尼米喺65分钟破蛋，追成1比4。尾段拉舒福特甫落场即建功，加埋基亚利殊都有波入，英格兰赢到6比1。补时阶段泰尼米射入12码，最终英格兰6比2大胜全取3分。