葡萄牙球星C朗同曼联反晒脸，预料世界盃结束後唔会归队，等明年1月转会市场重开後，加盟其他球队。西班牙《每日体育报》爆料，指C朗希望重返西甲，向皇马自荐回巢，踢下半季赛事。

早已传出C朗有意重返西甲，今夏就有消息指经理人佐治文迪斯帮佢铺路加盟马体会，但由於对方无法负担巨额薪酬而作罢，重返皇马成为C朗少数可行之路。据悉C朗甚至不惜降低要求，只需要半年合约已经足够，等踢完今季赛事再作打算。

原本皇马会长皮里兹冇打算签番C朗，但考虑到射手宾施马今季经常受伤，如果有C朗作为「替工」，都系一个唔错选择，令双方有望一拍即合。

C朗曾经效力皇马9年，球员生涯最辉煌日子都喺皇马度过，相信球迷都会欢迎佢回归。