卡塔尔喺揭幕战不敌厄瓜多尔，写下世盃史上多项耻辱纪录，包括成为史上第1支喺首仗输波嘅东道主，亦系28年来首次有东道主球队全场「0中龙」，难怪有过万球迷冇瘾提早离场，完场嗰阵球场内几乎只系剩番厄瓜多尔球迷。

自2006年开始，世盃揭幕战由衞冕球队改为主办国球队出战，过去4届「主队」有3胜1和佳绩，直到今届卡塔尔终於断缆。事实上，世盃史上从未有主办国球队喺第1场比赛输波，过去22支东道主(包括合办)，喺决赛周首仗有16胜6和成绩，卡塔尔惨成史上第1支首仗输波嘅东道主。

卡塔尔今场表现确实令人失望，全场5次射门0中龙，系1994年嘅美国之後，首支「0中龙」嘅世盃东道主。睇见球队踢到咁差，唔少卡塔尔球迷都选择提早离场，据英国《太阳报》报道，提早离场嘅球迷超过1万人，比赛尾段出现大量「空櫈」，令卡塔尔颜面无存。