克罗地亚周日（27日）晚上喺世盃F组第二轮分组赛，以4比1击败加拿大，当中卡拉马历个人梅开二度，成为最大功臣，仲成为全场最佳球员，赛後呢名效力德甲贺芬咸嘅前锋，就话自己要多谢加拿大主帅「激励」。

加拿大上场输畀比利时之後，主帅靴文（John Herdman）接受访问时话要「FUCK爆」克罗地亚，而今场表现出色嘅克罗地亚前锋卡拉马历，赛後就承认对方主帅呢番说话，刺激自己踢得更有动力：「我要多谢加拿大教练嘅激励，但最後克罗地亚证明咗边个FUCK边个。」

加拿大最终以1比4反胜为败，不过靴文却未有为自己嘅言论致歉：「一啲都冇後悔，我好尊重克罗地亚，球队喺场上竭尽全力争胜；不过反而完场之後我见唔到对方教练，好明显佢太开心，依啲嘢需要时间学习。」