德国喺世盃第2轮1比1逼和西班牙，入球功臣富克洛人气急升，呢位花名叫「Gap」(空隙)嘅29岁前锋，延续德国高大中锋嘅优良传统，领队费历克赛後大赞富克洛表现突出，暗示下场会用佢担正，对手真系要小心「空隙」！

富克洛大器晚成，喺云达不来梅出道嘅佢，先後去过纽伦堡、汉诺威打滚，2019年重返云达不来梅，可惜20/21球季降班德乙，但上季凭富克洛神勇表现，云达不来梅立即回升德甲，虽然贵为升班功臣，富克洛仍答应出现财困嘅球会减薪3成，而且表现非常精彩，踢14场联赛狂入10球，成功入选世盃大军。

富克洛嘅招牌系佢唔整齐嘅牙齿，门牙位置有条极大嘅牙罅，前云达不来梅队友阿拿奥杜域就帮佢改咗个花名叫「Lucke」，即系英文Gap(空隙)。云达不来梅喺2019年宣布签入富克洛嗰阵，官方twitter亦指喺贴出佢棚牙嘅特写，可见牙齿已经系佢嘅招牌。

由奇连士文、比亚荷夫到高路斯，德国传统都有个高大中锋挂帅，身高1米89嘅富克洛就成为最佳接班人，虽然佢头2轮都系後备上阵，但领队费历克赛後就暗示之後会用佢担正：「好开心佢展示出决心同入球能力，除入球之外仲有好多贡献，富洛克嘅心态非常正确，好开心德国队拥有佢。」