法国连续2届打入世界盃决赛，当球迷眼光中都集中喺基奥特、基利安麦巴比、基沙文等进攻球星嘅时候，门将洛里斯亦功不可没，呢位35岁队长今仗保持不失球，世界盃生涯第8次零封对手，仅次於法国前辈巴夫斯、英格兰名宿施路顿。

洛里斯已经19次喺世界盃上阵，追平德国国脚纽亚，并列呢项赛事史上最多上阵嘅门将，换言之嚟紧决赛，洛里斯将会刷新纪录。

洛里斯喺4强对摩洛哥，有出色表现，令对手往往望门兴叹，做出个人第8次世界盃零封，赛事史上仅比巴夫斯、施路顿少2次，如果想超越呢2位传奇门将，就起码要再参加多1届，但洛里斯已经35岁，恐怕下届未必有份。

赛後洛里斯话唔关心纪录问题，只期待同阿根廷交锋：「嚟紧决赛必定系一场激动人心嘅比赛，阿根廷已展现伟大之处，佢哋实力非常强大，美斯可载入史册。」