卡塔尔世盃告一段落，1个几星期後就到冬季转会窗展开，喺世盃有突出表现嘅球员自然成为抢手货。据英国同法国媒体报道，志切1月收购中场嘅利物浦，已将被誉为「世盃最佳中场」嘅苏夫恩岩拉伯特列为头号目标，领队高普更已同该摩洛哥国脚经理人会面，获得正面嘅回覆，利物浦有望用4,000万镑转会费抢人。

26岁嘅苏夫恩岩拉伯特目前效力意甲费伦天拿，佢喺世盃带领摩洛哥神奇杀入4强，表现一鸣惊人，准决赛输畀法国之後，获法国总统马克龙赞扬系「世盃最佳中场」。据法国《Foot Mercato》报道，利物浦领队高普将苏夫恩岩拉伯特同祖迪比宁咸列为收购目标，前者会系1月嘅「主打目标」，高普早前同佢经理人已经有接触，嚟紧会再有进一步斟介。

《Foot Mercato》消息指，费伦天拿对1月卖走苏夫恩岩拉伯特持开放态度，佢依家嘅合约去到2024年夏天完结，费伦天拿定价只系4,000万镑，不过利物浦亦面对唔少竞争，包括马德里体育会、热刺同一间未开够德甲球会都有兴趣将佢收购。报道指利物浦处於领先位置，因为苏夫恩岩拉伯特更有兴趣进军英超，而利物浦就系佢嘅首选。

利物浦今个夏天收购中场计划失败，加上法宾奴、佐敦轩达臣、堤亚高艾简达拿随年纪增加表现下滑，哈维艾利洛、居迪斯锺斯同拿比基达亦未符合期望，「红军」1月买中场事在必行，如果成功签入苏夫恩岩拉伯特，明年夏天会再主攻祖迪比宁咸。