西班牙喺今届世界盃16强出局，球队识传、唔识射为人诟病，列斯联前锋洛迪高今季状态大勇，正系「斗牛兵团」急需要嘅锋线人物，呢位31岁射手有望重返国家队，协助西班牙重建。

洛迪高出身於皇马青训系统，曾经效力华伦西亚6季，最威水系2017/18年球季西甲射入16球，并有份出战2018年世界盃，但之後事业走下坡，2020年夏天加盟列斯联首2季，合共仅入13球。

不过，洛迪高今季大翻身，踢13场英超已入9球，包括近4次披甲入5球，但西班牙前主帅安历基仍然唔徵召洛迪高参加世界盃，备受争议，呢位老将被传媒评为落选西班牙名单嘅最佳5位球员。

随住安历基下台，洛迪高终於迎来转机，相信佢只要保持水准，好大机会重返西班牙大军。