拿玻里今季喺意甲同欧联成绩突出，南韩中坚金玟哉亦成为当红炸子鸡，佢喺2022年身价暴升，获德国网站《转会市场》选入去年「升值11人」。据报拿玻里准备向呢位南韩中坚开新合约，防止曼联进行挖角。

《转会市场》根据各位置球员喺2022年嘅升值情况，选出「升值11人」，金玟哉由原先650万欧元，急升至3,500万欧元，喺中坚位置同克罗地亚嘅加华度尔齐齐上榜，亦系11人阵容当中唯一一个亚洲球员。

意大利传媒报道，盛传受到曼联、利物浦等垂青嘅金玟哉，合约内有一条4,500万欧元买断条款，将会喺今年7月31日後生效，拿玻里认为「买断费」太低，已经追唔上金玟哉嘅真正身价，所以正同佢倾谈新约，希望废除或提高买断条款。