拜仁慕尼黑近日物色门将，顶替早前度假滑雪断脚嘅纽亚，佢哋喺卡塔尔世盃各队门将之间挑选，最终选定效力慕逊加柏嘅瑞士门将恩尼森马，报价400万欧元。

德甲仲有一段时间先重开，不过拜仁搵门将已经时间无多，佢哋最初睇中世盃两大惊喜球队嘅钢门，曾经传出有兴趣签入克罗地亚神龙利华高域，以及摩洛哥门神耶辛尼保奴，但最後佢哋拣咗瑞士门将恩尼森马。

34岁嘅恩尼森马喺卡塔尔世盃上阵3场，首仗1比0零封喀麦隆为球队打下出线基础，小组次仗被卡斯米路射入世界波，结果0比1不敌巴西，第3场分组赛并无上阵，16强对葡萄牙则狂失6球，以1比6大败出局，总结恩尼森马喺世盃3仗共失7球。

德国传媒报道，恩尼森马与慕逊加柏合约尚余半年，拜仁虽然心急搵龙门，但唔会乱使钱，向慕逊加柏报价400万欧元转会费，恩尼森马亦希望加盟拜仁，现等待慕逊加柏还价。