江山代有才人出，过往由球坛名宿、超级劲旅写下嘅「神级纪录」，随住後人嘅努力，嚟到2023年就有10项纪录都有机会被打破，球迷们有望一齐见证呢个「神级新时代」。

祖亚昆挑战西甲出勤王

贝迪斯前锋祖亚昆，距离巴塞隆拿名宿苏比沙列特嘅西甲出场纪录622场仅差16场。今季贝迪斯仲有22场联赛，祖亚昆喺数字上可以喺今季完成壮举，但41岁嘅祖亚昆今季只为贝迪斯上阵过6场，1次正选5次後备，佢嘅合约季尾就结束，不过由贝迪斯青年军开始踢起，相信只要祖亚昆唔话退休，贝迪斯都会同佢续约。

除咗贝迪斯，祖亚昆曾经效力华伦西亚同马拉加另外两支西甲球队，於2004/05年及旧年助贝迪斯夺得西班牙盃，2007/08年效力华伦西亚时亦赢得呢个本土锦标。

巴塞女足超班差3场达成50连胜

巴塞隆拿女足有望成为历史上第一队获西甲50连胜嘅球队。自从2021年6月21日以3比4不敌马体会女足以来，巴塞女足喺近18个月已经取得联赛47连胜，期间射入233球，仅失19球。

伊巴力争「最老入球者」

如果今季41岁嘅伊巴谦莫域能够为AC米兰喺意甲入球，呢名瑞典战神就会超越哥斯达古达，成为意甲历史上年纪最大士哥拿。同时，如果45岁嘅保方，能够助帕尔马升上意甲，并且喺下季继续为球队效力，他就会超越巴路达，成为意甲历史上最年长球员。

C朗追逐国家队上阵200场

C朗同科威特球员艾穆华，同样代表国家队196次，同时保持紧呢个世界纪录，C朗射入118球，後者射入56球。C朗上年为葡萄牙上阵12次，艾穆华则代表科威特8次。两人都将会喺2023年度过38岁生日，究竟有无机会喺今年冲破200场大关？C朗去到次级联赛，而且喺国家队作用大减，未知新葡萄牙国家队领队，仲会唔会召佢入大军。

单季34球夏兰特叫定胡

呢个相信好多人认为都会破到嘅纪录，高尔喺1993/94球季，以及舒利亚喺1994/95球季，单季射入34球，值得留意嘅系，当年系22队踢42轮。今季加盟曼城嘅射手艾宁夏兰特，16场英超上阵已经射入21球，佢仲有21场畀佢搵14球破纪录，相信指日可待。

美斯破天荒7夺世足先生

相信都系最众望所归嘅纪录，美斯系2009至2012、2015年及2019年，6度获得世界足球先生荣誉，如果今年佢再夺殊荣，将会破纪录第7次获奖。巴西嘅女球王玛达同样6度获得世界足球小姐，暂时同美斯平分呢个纪录。由於上年世界足球先生唔计世界盃成绩，今年美斯大热胜出，相信都无乜异议。

PSG剑指逾96分封王

巴黎圣日耳门喺法甲2015/16赛季取得96分，创造联赛纪录。PSG新年第1场爆大冷，作客1比3不敌朗斯，但仍然取得以17战14胜2和1负44分排榜首，联赛剩番21场，佢哋赢晒就有机会攞107分，打破旧纪录。

卢多格德斯冲击12连霸

如果卢多格德斯赢得今季保加利亚联赛冠军，佢哋将成为历史上第7支连续12次获得联赛冠军嘅球队。卢多格德斯2011年首次升入保加利亚超级联赛，随後连续11次赢得联赛冠军，现时佢哋落後榜首索菲亚中央陆军1分。

之前6支连续赢得超过12次联赛冠军嘅球队分别系约旦的Al-Faysali（1959至74年共13次）、白俄罗斯嘅巴迪（2006至18年期共13次）、挪超洛辛堡（1992至2004年共13次）、直布罗陀嘅林肯红魔鬼（2003至16年共14次）、拉脱维亚球队史干图（1991至2004年期间共14次）及瓦努阿图嘅Tafea（1994年至2009年共15次）。

森巴神童同「16岁比利」斗快

已故球王比利系巴西最年轻入波球球员，佢喺对阵阿根廷嘅比赛中，以16岁8个月零14日入波。皇家马德里12月签入彭美拉斯16岁神童恩迪克，恩迪克上年成为彭美拉斯一队成员，上阵7次入3球，助彭美拉斯夺得巴甲冠军，如果恩迪克能够入选巴西国家队，并且喺4月4日之前为巴西入波，佢就会打破球王比利嘅纪录。

加国足球女王入球200+在望

加拿大女足射手姬丝甸冼佳亚，只要喺今年内再射入10粒，就会成为首位射入200个国家队入球嘅球员。姬丝甸冼佳亚由2000年开始，连续23年为加拿大国家队上阵，319次出场射入190球。参与过5次女子世界盃（2003年、2007年、2011年、2015年及2019年）、4次奥运（2008年、2012年、2016年及2021年），呢名39岁加拿大老大姐，於2021年带领「枫叶国」称霸奥运。

姬丝甸冼佳亚嘅190球纪录，系男、女子足球员都系「世一」，而佢代表国家队超过300次亦系一项纪录，国际足协旧年1月，更颁发一个特别奖畀姬丝甸冼佳亚表扬佢嘅成就。