周日(15日)英超大战，纽卡素主场惊涛骇浪下1比0小胜富咸，不过「喜鹊」赢得相当够运，富咸射手阿历山大米祖域喺下半场射12码「骑呢宴客」，造就阿历山大伊沙克喺89分钟绝杀。纽卡素赢波後以得失球压倒曼联升第3位，前4位置稳阵。

纽卡素同富咸近期状态都好好，今仗亦踢到势均力敌，69分钟富咸发动攻势，30秒之内有2次被纽卡素球员禁区内侵犯，但球证竟然全无表示，直到VAR介入先改判捷比亚犯规系12码，点知阿历山大米祖域操刀一刻跣脚，右脚射落左脚後弹入，但球例列明主射12码球员唔能够连续2次触球，结果球证判违规。纽卡素大难不死，89分钟由阿历山大伊沙克门前顶入，协助纽卡素赢1比0。

富咸领队马高施华赛後批评球证执法：「我要提今场嘅12码，唔系因为我哋射失，12码宴客经常发生，问题系球证点解会睇唔到30秒内2个明显嘅12码？而且罚12码应该系第1个犯规，丹般恩要2黄1红出场，呢个判决好关键，或者纽卡素最後都会赢，但错判就系错判！」