阿根廷球王美斯攞埋世界盃冠军之後，人气更盛，据法国媒体报道指，美斯喺卡塔尔世界盃後嘅首场比赛，返到PSG踢法甲着过嘅波衫，被一位中国买家以4万几欧元成功拍卖，仲破埋纪录。

巴黎圣日耳门自去年11月底开创球衣拍卖活动，用於资助球会基金项目，球会提前标明波衫会唔会有球员亲笔签名，又或者几时着过等等嘅资料，而今次呢件美斯30号PSG波衫，系呢位阿根廷队长自世界盃结束後踢首场比赛对昂热所穿着，结果以43,623欧元被一位中国买家卖走，佢第一次出价2万2千欧，最终出价第7次成功抢得心头好。

呢个拍卖价打破咗PSG开创呢个拍卖活动嘅最高纪录，而今次同场嘅拍卖会，尼马波衫就以7894欧元卖出，而之前基利麦巴比对朗斯同斯特拉斯堡嘅波衫，都分别以14,083欧元及15,017欧元成交。