纽卡素正式宣布同32岁右後衞捷比亚续约至2025年夏天，呢位英格兰国脚即使年纪唔细，但仍然有心有力，唔止防守出色，而且助攻力强，今季踢20场英超入1球及4次助攻，「喜鹊」向呢位老将开出2年新约，绝对系众望所归。

捷比亚上年1月由马体会回流英超，加盟纽卡素，成为呢支「新土豪」主将，佢对於续约感到非常开心：「我要感谢班主、领队、队友同球迷嘅支持，由我踏入纽卡素第一步开始，已感到深受大家欢迎，我想为球队创出好成绩，现时全队士气都非常好。」捷比亚助阵之下，纽卡素今季各项赛事有16场保持不失球。

纽卡素领队艾迪侯域大赞捷比亚无论场外或场内都系一位好榜样，具备出色领袖风范，续约系对佢最好嘅奖励。

另外，据报纽卡素已经同爱华顿达成协议，同意以4,000万镑收购「拖肥糖」21岁前锋安东尼哥顿，将於短期内完成交易，「喜鹊」获得呢位新星加盟後，进一步增加争夺英超前4位嘅本钱。