修咸顿目前喺英超排包尾，降班危机深重，20场联赛只入17球嘅疲弱锋力系战绩沉沦原因，领队尼敦锺斯喺英联赛4强次回合前，公开「求救」话修咸顿需要前锋，据报球会亦全速做嘢，希望喺冬季转会窗完结前签入2名前锋。

修咸顿1月份相当积极，包括签入克罗地亚翼锋米斯拿夫柯锡同阿根廷中场卡路士艾卡拉斯，但主帅尼敦锺斯表示：「我哋要一个正前锋，或者一个可以出任前线唔同位置嘅球员，球队前场需要制造更多机会，我哋仲有时间去实现转会计划。」

据报修咸顿想签入2名新前锋，包括用2,000万欧元收购雷恩翼锋苏尼马拿，另外亦打热刺嘅巴西前锋卢卡斯莫拉主意，消息指热刺已经同意畀卢卡斯莫拉自由转会，但新球会要负责佢15万周薪人工。