每年2月4日系世界癌症日，多蒙特「抗癌斗士」施巴斯坦贺拿就喺呢一日，拎到佢代表多蒙特首个入球，协助球队主场5比1大炒弗赖堡。多蒙特为响应世界癌症日、兼支持对抗睾丸癌嘅施巴斯坦贺拿，开波前特别将中圈额外加上代表睾丸肿瘤嘅线条，呼吁各界关注。

施巴斯坦贺拿上年夏天加盟多蒙特後，即被验出患上睾丸癌，德甲歇冬後已经复出，今场世界癌症日对弗赖堡，正选上阵嘅佢顶入加盟後首个正式赛事入球，帮球队领先到3比1，而多蒙特最终大胜5比1完场，德甲4连胜後升上积分榜第3位。

施巴斯坦贺拿赛後表示：「呢个入波对我意义重大，呢个系我为多蒙特入嘅第1球，我由加盟第一日开始已经期待呢个场面，我好开心，当入波嗰一刻，我觉得自己同整个球场、队友融为一体。」