周日（12日）英超头场，事隔4日後再上演玫瑰打吡，曼联有今仗达到400场英超里程碑嘅钢门迪基亚屡救险球，加上喺末段5分钟内连入2球，脚头超顺嘅拉舒福特又有士哥，作客以2比0击败列斯联，为周中欧霸附加赛对巴塞隆拿壮行色。

由於曼联周中喺欧霸附加赛出战巴塞，今仗明显有所保留，一对正选中坚华拉尼及利辛度马天尼斯被收起，已被打入冷宫嘅队长哈利马古尼，则夥拍移入中路嘅劳基梳尔，都咪话唔惊，今仗系钢门迪基亚第400场英超上阵，亦系曼联首位达到呢个里程碑嘅门将。

双方4日前先喺联赛补赛交手，当时曼联喺主场几经辛苦才逼和列斯联2比2，今仗主客互调，双方初段都冇乜入肉埋门，列斯联有森马维里近门炒高，哈利马古尼想回传畀积夏里逊逼甩咗个波，几乎出事，好彩佢及时解围补镬，之後森马维里埋门被迪基亚封出。完半场前曼联还以颜色，般奴费南迪斯单刀被救出，半场互交白卷。

易边後列斯联压住曼联嚟攻，森马维里施冷箭畀迪基亚飞身扑出，艾宁快射省到劳基梳尔仅仅出界，之後森马维里於右路窄位狂抽，又过唔到迪基亚。虽然曼联全面捱打，但去到80分钟拉舒福特接应劳基梳尔妙传顶入打破僵局，近9仗联赛入8粒，脚风顺到冇朋友，冇耐後备入替嘅加拿祖整多粒，最终惊险赢波。