曼城喺英超榜首大战作客3比1击败阿仙奴，挪威前锋艾宁夏兰特今场又有进帐，打破3场入球荒之余，更以26个入波追平曼城传奇阿古路嘅英超单季入球纪录，不过艾宁夏兰特并唔满足，赛後讲笑话：我又有20分钟入球荒！

艾宁夏兰特对上3场赛事冇波入，今仗作客阿仙奴掂波次数唔多(34次)，但每次都制造都威胁，3次射门2次命中目标，82分钟更射入锁定3比1胜局嘅入波，今季英超入波增加到26球，追平阿古路喺14/15球季嘅曼城单季英超最高入球纪录。

艾宁夏兰特赛後表示：「大家都同意阿仙奴系今季目前表现最好球队，作客嚟呢度踢唔容易，但我哋踢得好出色并拎到重要3分，依家需要踢出一段连胜走势，我会尽最大努力，亦会确保队友都尽最大努力。」对於自己打破3场入球荒，艾宁夏兰特就笑住回应：「我又有20分钟入球荒，所以要继续努力！」