皇马欧联出局後有新动作，就系打算签入爱斯宾奴33岁前锋祖斯奴，用嚟做宾施马嘅後备，等待爱斯宾奴踢完护级战，就会付诸行动。

西班牙传媒指出，皇马作客惨败於曼城脚下之後，反映唔少问题，前锋线调动系其中之一，射手宾施马欠缺轮换，令佢压力沉重。

皇马暂时唔会大换血，却奥斯同莫迪历将会留队，35岁嘅宾施马亦将续约，原班人脚打欧联，强化阵容最快方法，就系帮宾叔搵个後备。

祖斯奴今季为爱斯宾奴上阵35场，交出16入球4助攻，佢擅长空中对抗同背对龙门做二传，最近入选西班牙国家队，首次上阵攻入2球，而且佢喺2010至2012年踢过皇马，上阵2场，可以话系自己人，适应上绝无问题。