车路士聘请新帅行动终有定案，阿根廷名帅普捷天奴周五(19日)飞抵伦敦，将会为3年合约最後签纸。据报普捷天奴将喺英超煞科前，逐一约见车路士球员进行面谈，决定夏季组军嘅计划，而包括高华锡在内嘅7名球星已率先被挂牌出售，希望可以极速清货。

据伦敦《标准晚报》报道，距离英超煞科只有1个星期多啲，普捷天奴已抵达车路士准备签约，而且行程相当紧密，佢会先同看守领队林柏特会面了解球队情况，之後会喺球员休季度假前，逐一约见倾谈未来方向，并且同教练团、高层落实夏季组军同季前备战计划。

车路士今季疯狂买人後出现人满之患，报道指普捷天奴已率先放弃7名球星，包括高华锡、奥巴美扬、薛耶治、基斯甸普列锡、赫臣奥度尔、罗夫度斯卓克同艾度亚文迪，至於剩1年合约嘅美臣蒙特同尼高路简迪，去留仍未决定，普捷天奴亦唔抗拒同外借国际米兰嘅前锋卢卡古合作。

消息指车路士嘅清洗行动会极速进行，尤其要赶喺6月30日完结嘅财政年度前完成，令球队帐目可以符合财政公平条例。另外，普捷天奴返英国首演落实，但唔系执教车路士，而系喺6月11日带领世界明星队，喺奥脱福球场踢慈善赛。