曼联球星安东尼马菲奥斯家暴事件，近日再有新发展，据巴西媒体报道，女事主Gabriela Cavallin嘅前司机同好友周四(21日)被传召录口供，2人都指证安东尼曾经虐打Cavallin。

巴西多间媒体报道，Cavallin嘅前任司机奥利维拉向警方作供，表示曾经同安东尼3次见面，第一次系2021年11月。奥利维拉指其中一次，佢收到Cavallin嘅求救讯息，女方声称被安东尼虐打，之後安东尼仲打电话畀佢话：「喺我未做嘢前，快啲嚟带佢走！」奥利维拉表示到达後，见到Cavallin面部同手臂都红晒。另有一次喺机场接载两人，安东尼上车後强行拎Cavallin电话，检查佢同咩人联络过。

据报Cavallin嘅好朋友Brenda亦有去警署作供，Brenda表示知道晒安东尼同Cavallin拍拖後所有事情，亦目睹几次袭击事件。消息指Cavallin早前已自愿向警方交出手机，畀警察检查两人嘅对话讯息，安东尼就坚称自己从来冇袭击过任何女性。