英国《每日邮报》爆料，指曼城已经同阿根廷球队河床达成协助，同意以1,500万镑转会费收购河床前锋祖利安艾华利斯，呢位21岁新星将以借用身份继续效力河床至今年夏天，等下季先至正式为曼城披甲。

据悉，祖利安艾华利斯同河床嘅合约有买断条款，只要有球会出到1,700万镑，就可以签入佢。由於曼城愿意签入祖利安艾华利斯之後，继续将呢位射手外借畀河床多半年，所以获得「减价」。

曼城平价买到祖利安艾华利斯，可以话系执到宝，因为佢属於现今阿根廷球坛最炙手可热嘅新星，喺2021年为河床各项赛事上阵46次射入24球及15次助攻，包括协助球队夺得自2014年之後首个联赛冠军，自己亦以18个入球，成为联赛神射手，亦系阿根廷夺得上年美洲国家盃冠军嘅成员，并有份入选最新一期国家队名单，但佢至今为阿根廷上阵5次，仍然未取得入球。

身高1米73嘅祖利安艾华利斯出身於河床青年军，18岁已经为球队上阵，佢走位灵活，射门把握力强，踢法同早前因心脏问题挂靴嘅前曼城射手阿古路相似，因而被誉为「新阿古路」。

曾经传出曼联、拜仁慕尼黑、马体会都睇中祖利安艾华利斯，但曼城胜在出手快，以「先签後借」方式说服河床放人。事实上，曼城2016年向巴甲球队彭美拉斯收购加比尔捷西斯，都系用「先签後借」方式，令佢可以为母会效力多半年，先至登陆英超。