英超煞科日充满戏剧性，除咗曼城神奇夺冠之外，金靴奖同样要斗到最後一刻，热刺嘅南韩前锋孙兴民同利物浦嘅穆罕默德沙拿，最後20分钟上演入球大斗法，孙兴民喺一度反超前下，最终同沙拿以23球并列神射手。孙兴民成为英超史上首个亚洲金靴，亦系首个亚洲球员喺欧洲5大联赛做神射手，为亚洲足球写下新里程碑。

煞科战前孙兴民以1球落後沙拿，今仗作客诺域治入球慾明显大增，但上半场多次黄金机会都浪费，直到70分钟终於拎到入波，5分钟之後再下一城，当时佢就以23个入波独占射手榜第1位，不过沙拿喺另一边完场前6分钟为利物浦入波，令2人并列金靴奖得主。

孙兴民赛後表示：「拎到金靴奖系难以置信，我真系非常激动，呢个系我细路仔时嘅梦想，依家终於喺我手上面，真系唔敢相信。入波之前我对自己连环失机非常懊恼，但我冇放弃，我好想入波，大家都睇到队友不断帮我。呢个奖真系好重，今日系非常非常美好嘅一日。」

沙拿最後关头打破入球荒再做神射手，系佢个人第3次拎到英超金靴，得奖次数仅次於阿仙奴传奇亨利(4次)，呢位埃及前锋同时以13次助攻成为今季英超助攻王，系英超史上第4个单季包办神射手同助攻王嘅球员。至於英超金手套奖，就由艾利臣比加(利物浦)同艾达臣摩拉斯(曼城)以20场不失球共同分享。