周三晚（2日）巴塞隆拿宣布，正式签入啱啱同阿仙奴解约嘅前锋奥巴美扬，延续阿仙奴专卖队长畀巴塞嘅传统，双方签约3年半，有指阿仙奴仲要赔700万镑分手费送走呢位射手，认真无奈。

阿仙奴喺较早时间於官方发声明，同奥巴美扬达成解约协议，并感谢佢过去4年为球队贡献好多重要入球。阿仙奴为踢走佢张35万镑周薪「肥约」，决定同佢提前18个月解约，今次解约收唔到转会费，但为咗悭番其年半约2,500万镑人工，惟有一次性畀700万镑作部分补偿，总好过要养住呢位已不在主帅阿迪达计划之内嘅前锋。

巴塞於周三较後时间，正式宣布奥巴美扬免费加盟，并且完成注册，双方签约至2025年6月，违约金高达1亿欧元，奥巴美扬亦系继亨利、法比加斯及华美伦之後，另一位转投巴塞嘅阿仙奴队长。