周二凌晨嘅法足盃16强巴黎圣日耳门(PSG)对尼斯，阿根廷巨星美斯按赛例得以重披10号球衣上阵，可惜球队表现令人失望，仅与对手踢成0比0，互射12码更以5比6落败，今仗亦系美斯加盟PSG首个重大打击。

法足盃规例列明，正选11名球员必须穿上1至11号球衣，因此美斯今仗毋须穿上30号，首次披上PSG10号战衣上阵，亦系佢2022年首次正选比赛，可惜全场围攻对手，控球率接近7成，都无法攻破尼斯防线，互射12码阶段，美斯第1个射顺利命中，其後嘅基利安麦巴比都射入，可惜队友唔争气有两人射失，最终输5比6出局。

PSG球星云集，本土赛横扫只系基本任务，虽然佢哋喺法甲遥遥领先，但法足盃早早出局亦引发不少嘘声，仲有两星期欧联16强开战，PSG火并皇家马德里，将会系佢哋另一考验。