今日(2月5日)系曼联球星C朗37岁生日，但佢喺「牛一」前夕英足盃第4圈射失12码，成为出局罪人，今次亦系呢位葡萄牙巨星相隔14年後，再次喺法定时间90分钟，为曼联射失12码。

C朗对上1次喺法定时间为曼联射失12码系2008年欧联4强首回合作客巴塞隆拿，开波3分钟，佢主射12码高出，最终打和0比0，幸好曼联次回合胜出打入决赛。不过，C朗喺决赛互射12码阶段又宴客，好彩曼联最後都射赢车路士，夺得冠军。

C朗职业生涯曾经172次主射12码，射入143球，射失29球，命中率有83%。佢今场英足盃虽然上半场射失12码，但到咗互射12码阶段成功命中，可见佢仍然保持信心。

另外，巴西球星尼马都系2月5日生日，今年刚好30岁，其他喺2月5日出世嘅球坛名人仲有泰维斯、云邦贺斯等等。