曼联中坚艾历拜利为科特迪瓦踢完非国盃之後，又再次受伤，红魔鬼官方宣布呢位27岁後衞出现足踝肿胀问题，估计需要休息2星期。由於呢位「玻璃脚」近年抖多过踢，盛传曼联将於今季结束後放走佢。

艾历拜利今季仅为曼联上阵6次，已经多次传出会方打算放弃佢，关注英超伤病组织「Premier Injuries」创办人Ben Dinnery指艾历拜利今次伤势并唔严重，但问题系佢近年经常受伤，令曼联管理层失去耐性：「曼联中坚有哈利马古尼、华拉尼、域陀连迪路夫，就算後备上阵优先次序，菲尔锺斯都先过艾历拜利，佢今次受伤後，仲会唔会再为曼联上阵，实属疑问。」

艾历拜利同曼联仲有1年半合约，据悉AC米兰、罗马等多支意甲球队都有兴趣签佢，今夏离队机会非常大。

另外，曼联今夏有可能再买中坚，多蒙特2位守将萨加度、文路尔艾简治都系红魔鬼嘅收购目标。