利物浦喺对修咸顿嘅争标关键战，起用大批副选球员上阵，不过一班後备兵就大踢争气波，其中日本国脚南野拓实就为球队攻入扳平一球，今季各项赛事已累积「双位数」入波，领队高普赛後亦向一众後备道歉，形容南野拓实冇更多上阵机会系佢嘅「罪过」。

喺穆罕默德沙拿、沙迪奥文尼同路尔斯戴亚斯齐齐休息下，南野拓实今场难得担正，最终亦拎到入波为球队获胜。今场系佢今季首次喺联赛踢正选，但已有3个英超入波，各项赛事合共有10球进帐，亦系继穆罕默德沙拿、沙迪奥文尼、迪亚高祖达同罗拔图法明奴後，利物浦今季第5个入球达双位数球员。

高普赛後表示：「我犯罪！我要道歉！好多人质疑我今场排嘅阵容，但我好满意(个阵容)，好似哈维艾利洛，我已经唔记得佢上次踢系几时、居迪斯锺斯亦失去比赛节奏，南野拓实冇更多上阵时间系我嘅罪过...要球员坐冷板系好难嘅决定，我好欣赏佢哋嘅回应。」