利物浦新援路尔斯戴亚斯，今场对李斯特城上演英超地标战，虽然未有入球进帐，但佢今场喺左路活跃嘅表现已令人留下深刻印象，甚至获得领队高普赞扬。

今轮英超赛事，「红军」喺主场凭迪亚高祖达梅开二度，2比0轻取李斯特城。刚以5,000万镑从波图收购番嚟嘅哥伦比亚国脚，路尔斯戴亚斯正选上阵，踢到90分钟先被换走。虽然今场冇入波同助攻，但佢喺左路嘅侵略性十足，45脚传球入面成功率高达91%，更有5次过人成功，4脚射门有2次射中。

赛後领队高普亦盛赞佢嘅表现：「佢表现同训练嗰阵一样咁好，佢系一位好聪明嘅球员，而且好有观察力，我哋通常唔想逼一位新球员喺一个星期内执行到要求，但佢嘅表现已显得佢系一位利物浦球员。」而佢今场嘅左路拍档安德鲁罗拔臣亦大赞呢位新队友：「第一课操练我就见到佢嘅能力，觉得佢会适合踢呢队波！」