周五(18日)凌晨欧霸盃筛选圈附加赛首回合，巴塞隆拿主场占尽优势下，只能以1比1逼和拿玻里。为巴塞入波嘅费伦托利斯今场亦系「败家仔」，佢1个人全场有9次射门，但除咗12码入波外其他8次都射唔中龙，包括糟蹋3次黄金机会，完场後费伦托利斯亦忍唔住自责落泪。

今仗系巴塞历史上第1次踢欧霸盃，上月加盟嘅「三叉戟」费伦托利斯、奥巴美扬同阿达马查奥尔全部正选，巴塞亦操控战局兼不断制造埋门，可惜费伦托利斯脚头无灵，28分钟佢接应奥巴美扬横传，中路推入禁区面临龙门竟然射高，1分钟後即被拿玻里反攻由施连斯基射入。

巴塞59分钟由阿达马查奥尔传中，博到拿玻里球员禁区内手球，费伦托利斯操刀追成1比1平手，不过呢位21岁前锋之後持续失机，完场前2度喺禁区内无人看管下射高，终究巴塞全场21次攻门都赢唔到波，费伦托利斯1人独占9次攻门8次唔中龙，佢完场後亦自责落泪，用波衫嚟抹眼泪，又要队友上前安慰。

陷入财政困难嘅巴塞，上月用6,500万欧元天价向曼城收买费伦托利斯，教练沙维当然对佢寄以期望，沙维赛後表示：「佢令我谂起苏亚雷斯，加盟初期都系入唔到波，巴塞嘅波衫系特别沉重，我好开心佢系巴塞一份子，费伦托利斯足球生计都系不断入波，佢未来亦会不断入波。」