因应俄罗斯对乌克兰战事，波兰足总早前宣布拒绝代表队与俄罗斯比赛，对於邻国发生嘅战事，波兰国家队主力门将施捷斯尼亦於社交平台上发声，表态支持足总嘅决定。而除了波兰足总之外，瑞典足总亦表示唔会同俄罗斯作赛。

效力祖云达斯嘅施捷斯尼，喺社交平台上写到：「喺普京决定入侵乌克兰嘅一刻，佢唔只系向乌克兰，仲系向欧洲嘅价值观开战；喺写呢段文字嘅时候我好心痛，但我嘅良知唔会畀我落场比赛。」施捷斯尼透露自己老婆系乌克兰人，佢嘅儿子亦有乌克兰嘅血统，因此见到当地人受困嘅情况，令自己唔可以袖手旁观。呢位前阿仙奴门将，直言就算球队因为呢个决定而被判输波，佢都一样会接受，唔会後悔。

世盃欧洲区附加赛下月底将会展开，波兰将会作客面对俄罗斯，两队胜方将与瑞典和捷克嘅胜方，争夺世盃决赛周参赛资格。而除咗波兰之外，瑞典及捷克足总亦宣布作出拒绝同俄罗斯比赛嘅决定，并敦促国际足协取消俄罗斯所涉及嘅赛事。