曼联喺「曼市打吡」惨负曼城後，爆出C朗拿度不满冇正选而「出走」闹剧，据报身处葡萄牙嘅C朗归队时间未明，今个周末对热刺嘅生死战上阵成疑。英国《太阳报》更指出，曼联今个夏天将进行大清洗，有多达16人面临离队，包括C朗拿度同保罗普巴等球星。

消息指C朗喺「曼市打吡」前得知冇份踢，早喺上周五(4日)已经飞返葡萄牙「养伤」，领队兰历克向来要受伤球员留喺曼彻斯特治疗，但球会对C朗今次「出走」仍未有任何官方回应。曼联周一(7日)放球员1日假後，周二(8日)会重新进行练习，C朗会唔会现身成为焦点所在。

C朗喺曼联短期情况仍有疑问，长远发展更加「冻过水」！《太阳报》报道曼联今夏将大换血，多达16名球员会被踢走，保罗普巴、卡云尼、连格同桑马达约满後会自由身离队，外借嘅云迪碧克、安东尼马迪尔亦无意归队，另外4位外借小将班顿威廉斯、锺达希、法根度柏利斯查同安达斯彭利拿将被卖走，长坐冷板嘅甸恩轩达臣同菲尔锺斯去意已决，官非缠身嘅格连活特归队无期，右闸云比沙卡同达洛治会有其中一个被卖走，加上已萌生去意嘅C朗同拉舒福特，下季「红魔鬼」可能面目全非！