巴黎圣日耳门(PSG)上星期喺欧联16强出局，表现令人极度失望，周日(13日)返法甲主场3比0大胜波尔多，不过仍然难以平息球迷愤怒，尼马同美斯2大球星全场被球迷狂嘘兼羞辱，教练普捷天奴赛後形容场面令人「伤感」。最新消息指，美斯不甘在「大巴黎」受屈辱，已联络母会巴塞隆拿，寻求重返巴塞可能性。

以PSG嘅豪华阵容，赢法甲冠军对球迷嚟讲系「基本要求」，欧联出局嘅伤痛先至难以平伏。PSG今场24分钟由基利安麦巴比先拔头筹，里安度柏利迪斯39分钟扩大纪录，而尼马就喺52分钟锦上添花，协助球队赢3比0，依家喺法甲榜首带出15分。

由赛前热身开始，到广播出场球员名单，美斯同尼马都受到主场球迷大声狂嘘，比赛期间尼马主射罚球唔入，甚至有PSG球迷大事庆祝。普捷天奴赛後表示：「冇一个锺意PSG嘅人唔为欧联出局而失望，今场比赛出现嘅情况令人伤感，美斯同尼马？我哋全队都好失望，亦会团结一致面对困难。」

唔少PSG球员都出声支持美斯同尼马，佢哋嘅前巴塞隆拿队友苏亚雷斯亦喺社交网留言：「一如以往，足球嘅记忆真系好短暂，美斯、尼马，永远撑你哋！我爱你哋！」

不过西班牙6台报道指，美斯对於被嘘相当恼怒，美斯的父亲已联络巴塞隆拿，寻求重返巴塞可能性，若然美斯回归巴塞，势必震动球坛！