英超劲旅车路士准备放盘，据报有多达200个买家有兴趣，英国地产大亨历克简迪（Nick Candy）被视为热门之一，据报佢最新为实现收购计划再出新招，包括聘请由前车路士球星维埃里创办嘅顾问公司帮手，希望可以靠关系增加胜算。

历克简迪系车路士忠实球迷，早前有报道指佢准备提出25亿镑收购，并答应再用15亿镑翻新史丹福桥球场，不过面对唔少中东、美国同欧洲财团竞争，最近佢就聘请顾问公司Tifosy协助收购，而呢间公司创办人之一系意大利名将维埃里，佢喺1996年至2000年间效力车路士，最初系做球员，後尾做埋领队兼球员，协助「蓝战士」捧走英足盃、英联盃同欧洲盃赛冠军盃冠军。

除咗维埃里嘅车路士背景对收购有帮助之外，Tifosy本身亦系足球坛入面交易买卖专家，曾经参与过曼联、祖云达斯、罗马同国际米兰嘅交易活动。维埃里表示：「好荣幸可以支持历克简迪收购车路士嘅行动，过去几个星期我见到历克简迪几次，对佢带领车路士嘅决心同视野绝冇疑问。」