热刺争逐英超前4之路收喜讯，佢哋周四(17日)凌晨作客2比0轻取白礼顿，趁第4位嘅阿仙奴输波拉近至只差3分，而更振奋嘅消息系王牌前锋哈利卡尼「返晒嚟」，佢今场入波後成为英超史上作客入波最多球员，庆祝嗰阵更将球迷掟向佢嘅汽水樽「窝利」射走，非常有型！

热刺上场联赛输畀曼联，今仗球员决心十足，开波5分钟哈利卡尼曾射空门唔入，37分钟古路施夫斯基起脚，省中基斯甸罗美路入网，热刺半场领先1比0。57分钟哈利卡尼突破越位单刀射入，呢球系佢喺英超第95个作客入波，超越朗尼(94球)成为英超史上作客「士哥王」，热刺亦赢2比0全取3分。

哈利卡尼经过季初低潮期後，近6场联赛狂入7球，今仗佢入波庆祝期间，有主场球迷向佢投掷汽水樽，点知哈利卡尼竟然跳起用左脚将个汽水樽踢开，展示超强「射术」！热刺领队干地赛後话：「哈利卡尼系世界级前锋，季初佢曾经迷失，但依家佢知道自己每场都有机会入波，态度非常正面，有一个咁嘅前锋会令球队更加强大。」