衞冕法甲嘅巴黎圣日耳门（PSG），继早前欧联出局之後，周日晚作客再惨吞摩纳哥3蛋，进一步加剧球会对主帅普捷天奴嘅信任危机，据报PSG为平息球迷不满，唔排除会提早同呢位阿根廷教头解约。

今场面对联赛积分榜排喺欧战资格区外嘅摩纳哥，PSG虽然有美斯因病倦勤，但仍派出两大前锋基利安麦巴比同尼马应战，可惜呢位法甲豪门占尽控球优势，却未能制造出太多威胁攻门。相反摩纳哥就靠宾耶达上下半场个入1球，个人梅开二度，以及禾兰嘅入波，最终以3比0击败PSG。赛後PSG继续以12分优势领先联赛「二哥」马赛，高踞法甲榜首，但失利就令球迷对PSG管理层嘅不满进一步加深。

赛後普捷天奴批评球队表现不可接受：「喺呢个水平嘅比赛，我哋唔可以有咁嘅开局。显然欧联失利对我哋影响好大，球队需要将呢样嘢抛诸脑後。」PSG早前於欧联16强次回合输波，被皇家马德里淘汰出局，称霸欧洲嘅梦想再次破灭，作为主帅嘅普捷天奴亦难辞其咎。呢场法甲失利，令呢位盛传会接掌曼联帅印嘅阿根廷主帅，喺PSG嘅前途被进一步蒙上阴影。