荷兰主帅「方丈」尹戈尔喺友赛丹麦及德国之前，公开抨击卡塔尔世盃改喺11月举行荒诞，一切都系为钱！

其实近年已有唔少声音批评国际足协做法，不过今次系尹戈尔以荷兰领队身份首次公开丧插FIFA，70岁嘅「方丈」并非small potato，以佢嘅江湖地位同声望，佢嘅睇法自然有一定份量。

尹戈尔表示：「我同荷兰足协秘书长都系一个委员会嘅委员，我直接提出意见，认为世盃喺嗰度（卡塔尔）举办系荒谬嘅，国际足协话要发展当地足球，我哋就要去嗰度比赛，咁系乱讲，根本唔关事，但呢个唔系重点，最重要系为钱同商业利益，呢啲先对国际足协最重要。」

「以我嘅专业知识，点解我唔系国际足协及欧洲足协委员，因为我一直反对呢类型组织，我会在世盃後讲更多，不过咁都无法改变现状。」

闹完FIFA，佢又为荷兰国家队未来发展讲番几句，佢话荷兰将会重召朗奴高文，等待世盃後，尹戈尔卸任主帅职务，朗奴高文就会重掌荷兰教鞭。

不过最新消息，尹戈尔讲完一大轮嘢之後，就确诊新冠肺炎，下仗赛事无缘领军。