英格兰足总周二(29日)宣布，中坚史东斯因伤患困扰，提前退队返去曼城治疗，实际伤情有待进一步检查，不过曼城本来已经有中坚主力鲁宾戴亚斯养伤，如果连史东斯都要休战，4月初开始嘅11日4战地狱之旅将有好大麻烦。

史东斯喺英格兰上场对瑞士嘅热身赛，本来系喺正选阵容之上，但赛前练习受伤而临时缺阵，领队修夫基赛後话抽起佢只系「预防性质」，预期佢可以喺第2场对科特迪瓦上阵，但事实系史东斯因伤周二宣布退队，意味佢嘅伤患可能比想像中严重。

曼城今季中坚主要由鲁宾戴亚斯、拿朴迪同史东斯轮流出任，其中鲁宾戴亚斯因伤已缺阵4个星期，而曼城喺4月6日开始嘅11日内，要连续对马德里体育会同利物浦各2次，直接影响曼城英超、欧联同英足盃3冠梦。